Að minnsta kosti átta manns slösuðust, þar á meðal stuðningsmenn Mexíkó á HM, þegar leigubílstjóri frá Moskvu missti stjórn á bíl sínum, að því er talið er, skammt frá Rauða torginu.
Í myndum frá öryggismyndavél sem dreift var á samfélagsmiðlum sést þegar leigubíllinn beygir til hægri er hann reynir að fara fram hjá gangandi vegfarendum á einstefnugötu.
Þegar hann er kominn að fjölförnum göngustíg gefur bílstjórinn í áður en hann keyrir á umferðarskilti.
Tveir gangandi vegfarendur reyndu að ná til ökumannsins með því að reyna að opna hurðina á leigubílnum.
Leigubílstjórinn stökk á endanum út úr bílnum og hljóp á brott.
Í lok myndskeiðsins sést þegar hópur fólks eltir manninn niður hliðargötu.
Að sögn lögreglunnar í Moskvu er maðurinn 28 ára frá Kyrgyzstan og var hann fluttur á lögreglustöð til yfirheyrslu.
Maðurinn er sagður hafa greint lögreglunni frá því að hann hafi unnið samfleytt í rúma tvo daga við að keyra ferðamenn sem eru í Rússlandi vegna HM í knattspyrnu og að hann hafi stigið óvart á bensíngjöfina með þessum afleiðingum.
Rétt er að vara viðkvæma við myndbandinu:
Video of today's incident in #Moscow, #Russia, in which a taxi vehicle rammed into pedestrians on the sidewalk: pic.twitter.com/6IQ6GOuZic
— Alex Kokcharov (@AlexKokcharov) June 16, 2018