Reality Winner, fyrrverandi verktaki hjá bandarísku þjóðaröryggisstofnuninni NSA, hlaut í dag 5 ára dóm. Winner viðurkenndi að hafa deilt leynilegum upplýsingum með fjölmiðlum, en hún átti allt að 10 ára dóm yfir höfði sér.
Hún var handtekin á síðasta ári fyrir að leka NSA-skýrslu um meint afskipti Rússa af bandarísku forsetakosningunum 2016 í fjölmiðla. Dómurinn er að sögn BBC sá lengsti sem veittur hefur verið fyrir að deila leynilegum upplýsingum með fjölmiðli.
Winner starfaði sem málfræðingur hjá starfsstöð NSA í Georgíu þegar hún var handtekin í júní í fyrra og ákærð undir njósnalöggjöfinni.
Það var eftir að rannsakendur tóku eftir broti í myndum af skjölunum sem lekið var sem grunsemdir beindust að Winner. Brotið benti til þess að þau hefðu verið prentuð út og send þannig til fjölmiðilsins. Í ljós kom að Winner var ein af aðeins sex einstaklingum sem hafði prentað skjölin út. Þá benti rannsókn á borðtölvu hennar til þess að hún hefði átt í samskiptum við fréttastofu,“ að því er fram kemur í ákærunni.
„Ég misnotaði heimild mína til að prenta út skýrsluna,“ segir Fox News að Winner hafi sagt við fyrirtöku í júní. „Ég gerði það af fúsum og frjálsum vilja.“
Í skjölunum, sem var lekið til fréttavefjarins The Intercept, er fullyrti að njósnadeild rússneska hersins hafi staðið fyrir netárás á að minnsta kosti einn birgja kosningahugbúnaðar í Bandaríkjunum, dagana fyrir forsetakosningarnar. Þar eru Rússar einnig sakaðir um að hafa sent um 100 embættismönnum kjörstjórna vefveiðipóst (e. phishing). Ekkert bendi hins vegar til að aðgerðirnar hafi skilað einhverjum árangri.