Yfirvöld á Indlandi hafa greint frá því að faraldur zika-veiru geisi í landinu. Áttatíu tilfelli hafa verið tilkynnt frá því í síðasta mánuði og í þeim hópi eru 22 óléttar konur. Tilfellin hafa öll greinst í Rajasthan-ríki í vesturhluta landsins.
Á Indlandi er moskítóflugan, sem ber zika-veiruna, útbreidd. Fyrst var greint frá því í janúar árið 2017 að maður hefði smitast af veirunni og var það þá í Gujarat-ríki.
Zika-veiran hóf að gera usla árið 2015 og hafa yfir 1,5 milljónir manna í meira en sjötíu löndum sýkst síðan þá. Flestir hafa sýkst í Suður-Ameríku.
Óléttum konum stafar einna mest hætta af veirunni og eru dæmi um að börn þeirra hafi hlotið heilaskaða.
Í Jaipur, höfuðstað Rajasthan-ríkis, ganga nú 330 sérsveitir um og úða skordýraeitri inni á heimilum um 440 þúsund íbúa sem eru undir eftirliti vegna hættu á að smitast.
Heilbrigðisráðherra Indlands, J. P. Nadda, segir að allir þurfi að vera á tánum og að öllum steinum verði velt við til að tryggja öryggi fólks.
Alþjóðaheilbrigðismálastofnunin segir að bóluefni gegn zika-veirunni verði líklega ekki fáanlegt fyrr en árið 2020.