Háttsettir þingmenn Repúblikanaflokksins eru mótfallnir því að Donald Trump Bandaríkjaforseti lýsi yfir neyðarástandi á landsvísu svo hann geti komist fram hjá Bandaríkjaþingi og fengið það fé sem hann þarf til að reisa landamæramúrinn umdeilda, sem var eitt af helstu kosningaloforðum hans.
Um fjórðungur bandarískra ríkisstofnana hefur verið lokaður í rúmlega þrjár vikur þar sem Trump hefur neitað að skrifa undir fjárlög ársins nema þar verði sett sérstakt fjármagn til að reisa múr á landamærum Bandaríkjanna að Mexíkó. Demókratar á Bandaríkjaþingi hafa hins vegar hafnað beiðni forsetans, en múrinn er sagður kosta um 5,7 milljarða dala, sem samsvarar um 680 milljörðum íslenskra króna. Lokunin hefur áhrif á um 800.000 ríkisstarfsmenn sem hafa ekki fengið greidd laun.
Öldungadeildarþingmaðurinn Ron Johnson, sem er formaður heimavarnarnefndar þingsins (e. Homeland Security Committe) segir í samtali við CNN að hann yrði ekki hrifinn ef Trump kysi að lýsa yfir neyðarástandi. „Ef það verður niðurstaðan fer það fyrir rétt og múrinn verður ekki reistur,“ segir Johnson.
Steve Scalise fulltrúardeildarþingmaður tekur í sama streng, þrátt fyrir að hann véfengi ekki vald Trumps til að lýsa yfir neyðarástandi.
Trump hefur lýst því yfir að yfirlýsing um neyðarástand væri „auðveld leið út úr þessu“ en segir að hann vilji fremur að þingið finni lausn á vandamálinu. Í færslu á Twitter í dag segir hann að skaðinn sem rekja megi til ótryggra landamæra, það er útbreiðsla eiturlyfja, glæpir og „mjög margt sem er slæmt“ sé mun verra en lokun alríkisstofnana. Segir Trump að því geti demókratar kippt í liðinn þegar þeir komi snúi aftur til Washington.