Mateusz Morawiecki, forsætisráðherra Póllands, hefur hætt við fyrirhugaða heimsókn sína á ráðstefnu í Ísrael. Ástæðan er ummæli Benjamin Netanyahu, forsætisráðherra Ísraels, um Pólverja og helförina.
Haft var eftir Netanyahu á ísraelsku fréttasíðunni Haaretz að Pólverjar hefðu aðstoðað nasista í helförinni. Ummælin hafa verið fordæmd í Póllandi vegna þess að það sé látið líta út fyrir að allir Pólverjar hafi unnið með Þjóðverjum í seinni heimsstyrjöldinni.
Talsmaður Netanyahu segir að rangt hafi verið haft eftir ísraelska forsætisráðherranum.
Talsmaður pólsku ríkisstjórnarinnar greindi Netanyahu frá því símleiðis að pólski utanríkisráðherrann myndi koma í stað forsætisráðherrans á ráðstefnuna.