Carlos Ghosn, fyrrverandi stjórnarformaður Nissan, er ævareiður eftir að hafa verið handtekinn í Tókýó þrátt fyrir að hafa í síðasta mánuði verið látinn laus gegn tryggingu.
„Handtaka mín í morgun er bæði hneykslanleg og gerræðisleg,“ sagði hann í yfirlýsingu. „Það verður ekki þaggað niður í mér.“
Saksóknarar eru sagðir rannsaka nýjar ásakanir á hendur Ghosn, sem var látinn laus gegn tryggingu eftir að hafa verið yfir 100 daga í haldi.
Fregnir bárust af því fyrr í dag að rannsókn stæði yfir á því hvort Ghosn hafi yfirfært 32 milljónir dollara til Oman. Heimildarmaður segir að eitthvað af þessum peningum hafi verið notaðir til að kaupa lúxussnekkju handa Ghosn og fjölskyldu hans.