Eiðsvarnir til að fylgja lögunum eftir

Mál móðurinnar sem sætir ákæru í Alabama vegna láts fósturs hennar eftir að hún var skotin í magann hefur vakið mikla reiði vestanhafs og víðar og hefur lögreglu í ríkinu borist fjöldi haturspósta.

Þar hefur fólk m.a. hótað sniðgöngu við fyrirtæki í Alabama, kallað lögregluna kvenhatara og farið fram á brotvikningu lögreglustjórans og lögregluþjónanna sem handtóku hina 27 ára gömlu Marshae Jones.

Frétt af mbl.is

Var skotin í magann og ákærð í kjölfarið

Robert Knight, lögreglustjóri í Pleasant Grove í Alabama, segir hins vegar að lögreglan hafi ekkert val haft í málinu. „Ef lögin eru til staðar þá erum við eiðsvarnir til þess að fylgja þeim eftir og það munum við gera,“ er haft eftir honum í frétt New York Times.

Málið þykir sýna svart á hvítu hvað það þýðir að hægt sé að lögsækja ófrískar konur í málum þar sem fóstur hafa réttindi manneskju í réttarkerfinu.

Þá segja aðgerðasinnar málið gott dæmi um áhættuna sem fylgi „persónuvæðingu“ (e. personhood movement) fóstra, hreyfingu sem krefst þess að fóstur fái réttindi til jafns, eða jafnvel meiri réttindi, en konan sem með þau gengur.

Frétt af mbl.is

Þungunarrof bannað í Alabama

Hreyfingin sú er á einna hraðastri uppleið í Alabama, en í Pleasant Grove deilir fólk ekki um það hvort Jones sé sakhæf í málinu, heldur fremur hversu mikla refsingu hún eigi skilið.

Jones lenti í rifrildi við aðra konu fyrir utan matvöruverslun í bænum Pleasant Grove, sem endaði með því að Ebony Jemison skaut Jones í magann með þeim afleiðingum að fimm mánaða gamalt fóstur hennar lést. Ákærur gegn Jemison hafa verið látnar niður falla, en hún er talin hafa skotið Jones í sjálfsvörn. Jones hefur hins vegar verið ákærð fyrir manndráp og sætir gæsluvarðhaldi vegna þess að „hún hóf og hélt rifrildinu áfram sem leiddi til dauða ófædds barns hennar“, samkvæmt lögreglumanninum Danny Reid. 

• 1 blogg um fréttina

Bloggað um fréttina

• Kristin stjórnmálasamtök: Byssuglaðir Bandaríkjamenn gæti að lífsrétti ófæddra!