Lýðveldissinni endurkjörinn forseti Taívan

Tsai Ing-wen, forseti Taívan, var endurkjörin í kosningum í landinu dag. Hlaut hún örugga kosningu, um 57% atkvæða gegn 39% helsta keppinautar síns, Han Kuo-yu, sem hafði lagt áherslu á nánara samstarf stjórnvalda í Taívan við Kínverja.

Úrslitin þykja athyglisverð fyrir þær sakir að Framsækni lýðræðisflokkurinn, flokkur Tsai forseta, tapaði stórt í þingkosningum fyrir tveimur árum. Flokkurinn hefur síðan sótt í sig veðrið og segja stjórnmálaskýrendur að bætt staða hagkerfisins og mistök stjórnarandstöðunnar skýri það að hluta, en ekki síður fjöldamótmælin í Hong Kong, sem hafi sýnt Taívönum hvernig umhorfs gæti verið í ríkinu undir kínverskri stjórn.

Aukin ógn Kínverja virðist hafa hjálpað Tsai, sem leggst gegn sameiningu ríkisins við meginland Kína. Í aðdraganda kosninganna sigldu Kínverjar nýju herskipi sínu í tvígang gegnum Taívansund, sem liggur milli meginlandsins og eyjunnar Taívan. Hefur Xi Jinping, forseti Kína, ekki viljað útiloka að ríkið grípi til vopna til að ná Taívan undir sitt vald.

• Blogga um frétt