Donald Trump Bandaríkjaforseti segir að ekki sé þörf á að setja New York ríki í sóttkví, en í gær hafði hann greint blaðamönnum frá því að hann væri að meta hvort setja ætti ríkið í sóttkví þar sem það væri suðupottur.
Seinna í gær tilkynnti forsetinn svo á Twitter að eftir ráðleggingar aðgerðahóps Hvíta hússins í málefnum kórónuveirunnar og ríkisstjóra New York, New Jersey og Connecticut hafi hann beðið miðstöð sóttvarna í Bandaríkjunum um að gefa út víðtækar ferðaviðvaranir í samráði við alríkisstjórnina. „Sóttkví er ekki nauðsynleg,“ sagði hann.
Meira en 52 þúsund tilvik hafa komið upp í New York og er það um helmingur þeirra smita sem hafa greinst í Bandaríkjunum í heild.
On the recommendation of the White House CoronaVirus Task Force, and upon consultation with the Governor’s of New York, New Jersey and Connecticut, I have asked the @CDCgov to issue a strong Travel Advisory, to be administered by the Governors, in consultation with the....
— Donald J. Trump (@realDonaldTrump) March 29, 2020
Miðstöð sóttvarna í Bandaríkjunum gaf svo út tilkynningu þar sem íbúar þessara þriggja ríkja voru hvattir til að ferðast ekki næstu 14 daga nema nauðsyn krefði. Þá var tekið fram að ferðaviðvaranirnar ættu ekki við um mikilvæga innviði, svo sem heilbrigðisþjónustu, heilbrigðisstarfsfólk og matvæladreifingu.
Áður en Trump bakkaði með áform sín um sóttkví fyrir allt ríkið hafði Andrew Cuomo, ríkisstjóri New York, gagnrýnt þau áform og sagði ekki hvort slíkt væri hægt lagalega séð og einnig að hann væri óviss hvortþ að myndi gera eitthvað út frá læknisfræðilegu sjónarmiði. „En ég get sagt að mér líst ekki vel á þetta. Ég veit ekki einu sinni hvað ætti að felast í þessu en ég get strax sagt að mér lítist ekki á þetta,“ sagði hann um hina mögulegu sóttkví í gær.
I am giving consideration to a QUARANTINE of developing “hot spots”, New York, New Jersey, and Connecticut. A decision will be made, one way or another, shortly.
— Donald J. Trump (@realDonaldTrump) March 28, 2020