Erlent | mbl | 3.8.2020 | 10:14 | Uppfært 13:37

Dieudonne aldrei aftur á Facebook

Facebook hefur lokað á Dieudonne það sem eftir lifir ævinnar. AFP

Facebook hefur lokað síðu franska grínistans Dieudonnes en hann hefur verið dæmdur fyrir gyðingahatur á facebooksíðu sinni. Í tilkynningu frá Facebook kemur fram að bannið gildi einnig fyrir Instagram og það sé til frambúðar.

Dieudonne hafi birt efni á síðunni þar sem hæðst er að fórnarlömbum helfararinnar. Í einhverjum tilvikum séu færslur hans á þann veg að gyðingum er líkt við skynlausar skepnur.

Dieudonne M'bala M'bala. AFP

Í tilkynningu frá Facebook kemur fram að þetta sé í samræmi við stefnu fyrirtækisins um að loka á hættulega einstaklinga og samtök og því hafi Dieudonne M'Bala M'Bala verið settur í bann til frambúðar bæði á Facebook og Instagram. Ákvörðun um að loka á einstakling til frambúðar er alltaf tekin að vel athuguðu máli en þegar einstaklingar og samtök ráðast á aðra á grundvelli þess sem þeir eru eiga ekkert erindi á Facebook og Instagram.

Google lokaði youtuberás Dieudonnes í júní af sömu ástæðu. Hann er með 1,3 milljónir fylgjenda á Facebook og um 400 þúsund á YouTube.

Frétt af mbl.is

Ekki grín hjá Dieudonne heldur hatur

Dieudonne M'bala M'bala hefur hlotið marga dóma fyrir rasisma og gyðingahatur. AFP

Alþjóðleg samtök gegn rasisma og gyðingahatri, The International League Against Racism and Anti-Semitism, fagna ákvörðun samfélagsmiðlanna og segja að færslur Dieudonnes hafi haft alvarleg og skaðleg áhrif á ungt fólk.

Dieudonne hefur ítrekað verið dæmdur fyrir ummæli sín, bæði í Frakklandi og Belgíu. Ummæli sem andstæðingar hans segja rasisma en fylgjendur segja að hann hafi rétt til þess að segja hvað sem er á grundvelli tjáningarfrelsisins að því er fram kemur í frétt AFP-fréttastofunnar.