Andrew Giuliani, ráðgjafi Hvíta hússins, hefur greinst með kórónuveiruna. Andrew er sonur einkalögmanns Bandaríkjaforseta, Rudys Giulianis, en hann hefur starfað í Hvíta húsinu frá árinu 2017.
Í tilkynningu frá Andrew á Twitter kemur fram að hann sé með væg einkenni. „Ég er með væg einkenni og fylgi öllum helstu sóttvarnareglum. Þá mun ég vera í einangrun og taka þátt í rakningu.“
Andrew var meðal gesta á blaðafundi Rudys Giulianis á fimmtudag, en þar greindi sá síðarnefndi frá áætlunum Hvíta hússins er varðar nýafstaðnar forsetakosningar í Bandaríkjunum. Að fundinum loknum ræddust feðgarnir við, grímulausir.
Jenna Ellis, einn lögmanna Trumps, var sömuleiðis viðstödd fund Giulianis á fimmtudag, en hún hefur greinst neikvæð fyrir veirunni. Þá staðfesti hún að Rudy Giuliani hefði sömuleiðis greinst neikvæður.