Samþykktu „sögulegt“ frumvarp um afglæpavæðingu kannabis

Kannabis er löglegt í 15 ríkjum Bandaríkjanna auk Washington-umdæmis.
Kannabis er löglegt í 15 ríkjum Bandaríkjanna auk Washington-umdæmis. AFP

Fulltrúadeild Bandaríkjaþings samþykkti í vikunni „sögulegt“ frumvarp um afglæpavæðingu kannabisefnis í öllum 50 ríkjunum. Í frumvarpinu felst meðal annars ógilding sakfellinga vegna kannabissölu eða notkunar á alríkisstigi. 

Ólíklegt þykir að frumvarpið fari fyrir öldungadeildina þar sem repúblikanar eru í meirihluta, eftir því er BBC greinir frá. Frumvarpið var samþykkt í fulltrúadeildinni með 228 atkvæðum, en 164 greiddu atkvæði gegn því. 

Neysla kannabis er lögleg fyrir þá sem eru eldri en 21 árs í 15 ríkjum Bandaríkjanna auk Washington-umdæmis. Þá hafa 38 ríki lögleitt notkun kannabis í læknisfræðilegum tilgangi. Efnið hefur þó verið ólöglegt í alríkislögum frá 1970. 

Joe Biden, kjörinn forseti Bandaríkjanna, hefur áður lýst yfir vilja sínum til að lögleiða notkun kannabis, en hvorki repúblikanar í öldungadeild Bandaríkjaþings né Donald Trump Bandaríkjaforseti hafa sagst munu styðja frumvarpið. Til að frumvarpið geti orðið að lögum þarf öldungadeildin að samþykkja það og Bandaríkjaforseti að skrifa undir. 

mbl.is