Saksóknari í Bandaríkjunum segir stuðningsmenn Trump Bandaríkjaforseta, sem brutu sér leið inn í þinghús Bandaríkjanna þann 6. janúar með skelfilegum afleiðingum, hafi ætlað sér að handsama kjörna fulltrúa og taka þá af lífi.
Þetta kemur fram í nýjum dómsskjölum saksóknara.
Dómsskjölin sem lögð voru fram af lögmönnum dómsmálaráðuneytisins í gær, voru m.a. gæsluvarðhaldsbeiðnir yfir Jacob Chansley, einnig þekktur sem Jake Angeli. Jake er maðurinn sem klæddist hornum og feldi og var áberandi meðal stuðningsmanna sem brutust inn í þinghúsið. Hann er þekktur fyrir að aðhyllast QAnon samsæriskenningar og kallar sjálfan sig QAnon seiðkarlinn.
„Sterk sönnunargögn, þar á meðal orðfæri og hegðun Chansleys í þinghúsinu, styðja að ætlun múgsins hafi verið að handsama og taka af kjörna fulltrúa í stjórnkerfi Bandaríkjanna af lífi,“ segir saksóknari um óeirðirnar þann 6. janúar.
Þá segir í skjölunum að Chansley hafi skilið eftir skilaboð á ræðupúlti Mike Pence, varaforseta og forseta öldungadeildarinnar, þar sem hann stóð einungis nokkrum andartökum áður. Á þeim stóð „Þetta er einungis tímaspursmál, réttlætið er á leiðinni“.
Chansley á að mæta fyrir rétt í dag en lögregla telur hann neyta fíkniefna að staðaldri og að hann glími við geðræn vandamál.
„Chansley hefur talað opinskátt um trú sína á að hann sé í raun geimvera sem, æðri vera, og að hann sé hér á jörðu til að hverfa í annan raunveruleika,“ segir í málsgögnum. Hann er talin hættulegur umhverfi sínu og hætt sé á að hann reyni að flýja.
Skjölin gefa frekari innsýn í rannsókn Alríkislögreglunnar FBI á atburðum dagsins sem leiddi til ringulreiðar og óeirða þar sem fimm létust.
Yfirvöld vinna nú að kærum á hendur einstaklinga sem tóku þátt í óeirðunum, þar á meðal á hendur manns sem veifaði suðurríkjafánanum innan þinghússins, manns sem að klæddist „Camp Auschwitz“ peysu og ólympíuverðlaunahafa í sundi.