Styrkja COVAX um fjóra milljarða dala

Bandaríkin munu styrkja alþjóðlega bólusetningarverkefnið Covax um fjóra milljarða Bandaríkjadala, jafnvirði um 518 milljarða íslenskra króna. Búist er við að Joe Biden forseti muni tilkynna um þetta á fundi G7-ríkjanna á morgun.

Covax snýr að því að tryggja öllum þjóðum heims aðgang að bóluefni við Covid-19. Megináhersla verkefnisins er að verr sett ríki heims geti fjármagnað kaup á nauðsynlegum bóluefnum.

Frétt af mbl.is

Ísland tekur þátt í að fjármagna kaup á bóluefni

Donald Trump, fyrrverandi Bandaríkjaforseti, hugðist ekki styrkja Covax-verkefnið, að því er kemur fram í umfjöllun Washington Post. Sú afstaða var í takt við erjur hans við Alþjóðaheilbrigðismálastofnunina. Annars hafa 190 ríki skráð sig í verkefnið.

Bandaríkin munu fyrst láta tvo milljarða dala af hendi í beinhörðu en svo nýta hina tvo milljarðana til að knýja á um að aðrar efnaðar þjóðir leggi sitt af mörkum til átaksins. 

Framkvæmdastjóri Alþjóðaheilbrigðismálastofnunarinnar, Tedros Adhanom Ghebreyesus, lýsti á dögunum yfir þungum áhyggjum af því að heimurinn væri á mörkum meiri háttar siðferðisbrestar, ef ekki tækist að koma á sem jafnastri dreifingu bóluefnisins. 

• Blogga um frétt