Stjórnvöld Úkraínu og aðskilnaðarsinnar studdir af Rússum deila um hvor ber ábyrgð á skotum og sprengingum í austurhluta Úkraínu í morgun. Atburðirnir eiga sér stað á sama tíma og Bandaríkin hafa talið Rússa leita að átyllu til innrásar í Úkraínu.

Átök hafa staðið yfir í austurhluta Úkraínu með hléum frá því Rússar innlimuðu Krímskaga árið 2014 en átök morgunsins benda til þess að auknar líkur séu á innrás Rússa.

Úkraínumenn segja að hersveitir studdar af Rússum hafi skotið að leikskóla í þorpinu Stanytsia-Luganska og að tveir óbreyttir borgarar séu særðir.

Úkraínskur hermaður kveikir í sígarettu. AFP

Þorpið illa úti

Dmytro Kuleba, utanríkisráðherra Úkraínu, sagði að þorpið hefði orðið illa úti eftir sprengingar en minntist ekkert á meiðsl eða mannfall. Hann fordæmdi árásirnar og hvatti aðrar þjóðir til að gera slíkt hið sama.

Kuleba benti á að sprengingarnar væru brot á Minsk-sátt­mál­an­um og vísar þá til sam­komu­lags sem náðist árið 2014 og átti að binda enda á átök í Úkraínu.

Rússneskar fréttaveitur greindu hins vegar frá því að hersveitir hliðhollar þeim sökuðu Úkraínuher um að auka spennuna á svæðinu og að þarlendar hersveitir stæðu fyrir þeim.

Dimitrí Peskov, talsmaður Vla­dimírs Pútíns, for­seta Rúss­lands, sagðist hafa áhyggjur af ástandinu og hvatti vestræn ríki til að vara stjórnvöld í Kænugarði við frekari árásum.

AFP

Tengdar fréttir

Úkraína

Selenskí þakkar Norðurlöndum fyrir stuðninginn

• Kallar eftir hernaðaraðstoð við Úkraínu
• Styrkir varnargetu Úkraínu svo um munar
• Bjarni ræddi við Selenskí: Úkraína þarf „tæki og tól“
• Mikill viðbúnaður í Stokkhólmi vegna fundarins

» Fleiri tengdar fréttir

• Blogga um frétt