Úkraínski vörðurinn á Snákaeyju sem sagði hina fleygu setningu „rússneska herskip, farðu til fjandans!“ var leystur úr haldi nýverið og fluttur heim til fjölskyldu sinnar í úkraínsku borginni Kerkasí.
Maðurinn heitir Roman Hrybov. Hann var verðlaunaður fyrir hugrekki sitt í gær og má hér að neðan sjá myndskeið af afhendingunni.
Þrettán landamæraverðir voru á eyjunni þann 24. febrúar síðastliðinn þegar rússneski herinn réðst inn í Úkraínu.
Hljóðupptaka af orðaskiptum hermanna á rússnesku herskipi og úkraínsku varðanna á eyjunni fór fljótt í dreifingu á alnetinu. Rússneska hersveitin skipaði þeim að gefast upp og lét Hrybov þá hin eftirminnilegu orð falla.
Fyrst um sinn var hermt að verðirnir þrettán hefðu neitað að gefast upp og að þeir hefðu verið drepnir í kjölfarið. Síðar kom í ljós að þeir væru á lífi og í haldi Rússa.