Nýr forseti kjörinn í stað þess útskúfaða
Setja bókamerki
Ranil Wickremesinghe, forsætisráðherra Srí Lanka, var rétt í þessu kjörinn forseti landsins. Þingmenn Srí Lanka kusu forsetann sem mun, að óbreyttu, sitja út kjörtímabil Gotabaya Rajapaksa, fyrrverandi forseta, sem var rétt rúmlega hálfnað þegar hann sagði af sér.
Hann hefur setið sem staðgengill forseta í um viku eða síðan fyrrverandi forseti landsins flúði heimalandið eftir mikil mótmæli gegn honum og stjórnarháttum hans sem sagðir eru hafa bætt gráu ofan á svart í slæmu efnahagsástandi Srí Lanka.
Wickremesinghe hlaut 134 atkvæði af 225. Þrír höfðu boðið sig fram en Dullas Alahapperuma fékk næstflest atkvæði eða 82. Anura Kumara Dissanayake bauð sig einnig fram og fékk einungis þrjú atkvæði.
Tók afstöðu gegn mótmælendum
Hörð afstaða hins nýkjörna forseta gegn mótmælendum hefur fallið í kramið hjá þingmönnum sem hafa þurft að þola ofbeldi af hálfu mótmælenda.
Srí Lanka er nú statt í erfiðustu efnahagskreppu landsins frá upphafi. Stjórnmálakerfið þar er flókið og þaðan hafa borist fréttir af spillingu.
Landinu hefur reynst ómögulegt að fjármagna nauðsynlegasta innflutning síðan seint á síðasta ári og hefur ríkisstjórnin síðan þá ekki náð að standa skil á greiðslum af erlendum skuldum sem nema tugum milljarða bandaríkjadala. Óánægja meðal íbúa hefur vaxið mánuðum saman vegna alvarlegs matar- og olíuskorts, metverðbólgu og langvarandi rafmagnsleysis.
Fréttin hefur verið uppfærð
Banna mengandi búnað sem leyfður er á Íslandi
„Hvílir mikil leynd yfir þessu öllu“
Sex hafa greinst með listeríu
Skiptir miklu meira máli en fólk grunar
Eyjafjarðarbraut lokað vegna alvarlegs umferðarslyss
Væri að ljúga ef ég segðist ekki stressaður
Telur forsendur fyrir vaxtalækkun