Erlent | mbl | 11.9.2022 | 20:05 | Uppfært 20:29

Ánægja með fylgið en sakna gamalla bandamanna

Deilt er um það innan Centerpartiet hvort rétt hafi verið að yfirgefa samstarfið við borgaralegu flokkanna. mbl.is/Gunnlaugur

Það er almennt létt yfir flokksmönnum á kosningavöku,Centerpartiet, systurflokk íslenska Framsóknarflokksins. En sitt sýnist hverjum um ákvörðun forystu flokksins um að yfirgefa gamla kosningabandalagið með hinum borgaralegu flokkunum.

Útgönguspáin gerir ráð fyrir 0,9 prósentustiga fylgistapi, en stjórnendur kosningabaráttu flokksins segjast í ræðu hæstánægðir, enda var töluverð áhætta að yfirgefa kosningabandalag borgaralegra flokka, vegna andstöðu við samstarf við Svíþjóðardemókrata.

„Við höfum sýnt að við þurfum ekki að selja sál flokksins. Nú djömmum við,“ segja kosningastjórarnir og Dreadlock holiday með bandinu 10cc ómar um salinn.

Frétt af mbl.is

Vinstri heldur velli samkvæmt spánni

„Okkur líður bara vel og það er svakalega góð stemning,“ segir Astrid Nord sem ásamt vinkonu sinni Josefin Stenquist fagnar nýjustu tölum á skjánum. „Það hefur verið gríðarlega mikið að gera í kosningabaráttunni, og getum ekki annað en verið ánægðar með stöðuna. Fylgi flokksins hefur sveiflast mjög í aðdraganda kosninganna og ef niðurstaðan verður eitthvað líkt þessu erum við ánægðar,“ segir Astrid.

Josefin kveðst sammála vinkonu sinni en segir jafnfram umræðuna hafa verið mjög pólaríserandi fyrir sænsk stjórnmál. „Staðan er mjög spennandi. Þetta er hnífjafnt.“

Josefin Stenquist og Astrid Nord eru sáttar með fylgið sem Centerpartiet virðist ætla að fá. mbl.is/Gunnlaugur

Vill leita til hægri

Astrid telur erfitt kunni að vera að vinna úr úrslitunum en viðurkennir að allir hafa ekki verið á einu máli með að styðja bandalag vinstriflokka. Bendir hún sérstaklega á ungliðahreyfingu flokksins.

„Ég vona að flokkarnir sem voru í gamla bandalaginu [borgaralegra flokka] nái að vera með stærsta þingmannahópinn og þá er hægt að mynda ríkisstjórn án Svíþjóðardemókrata,“ segir Ove Valin, sveitarstjórnarfulltrúi í Ekerö. Hann er ekki par hrifinn af ákvörðunina um að leita til vinstri.

Hann kveðst vona að flokkurinn fái meira fylgi en staðan nú bendi til, en telur jákvætt að Centerpartiet sé að öllum líkindum að fara að enda stærri en sósíalistaflokkurinn Vänsterpartiet og flokkur umhverfissinna, Miljöpartiet.