Þrjár konur skotnar til bana á kaffihúsi

Karlmaður skaut þrjár konur til bana og særði fjórar manneskjur til viðbótar í ítölsku borginni Róm í gær.

Lögreglan segir að árásin hafi hugsanlega tengst húsnæðisdeilum.

Giorgia Meloni, forsætisráðherra Ítalíu, greindi frá því á Facebook að eitt fórnarlambanna hafi verið vinkona hennar.

Grunaði byssumaðurinn, hinn 57 ára Claudio Campi, er sagður hafa hafið skothríð á íbúafundi sem var haldinn á kaffihúsi í norðurhluta Rómar og notað til þess skammbyssu af tegundinni Glock sem hann hafði stolið.

Í bloggfærslu í nóvember skrifaði hann um deilur við umsjónarmenn fjölbýlishússins þar sem hann bjó, sem hann sakaði um að hafa reynt að bola honum þaðan út.

Giorgia Meloni, forsætisráðherra Ítalíu. AFP/Ludovic Marin

Ein kvennanna þriggja sem var skotin til bana hét Nicoletta Golisano, fimmtug móðir tíu ára drengs. Meloni sagði í facebookfærslu sinni að þær hafi verið vinkonur og minntist hún hennar með hlýjum hug.

Hún sagði að byssumaðurinn hafi verið handtekinn og vonaðist til að réttlætinu yrði fullnægt.  

• Blogga um frétt