Erlent | AFP | 24.8.2023 | 22:11 | Uppfært 25.8.2023 1:03

Trump kominn í Fulton-fangelsið

Trump stígur hér úr vél sinni í Atlanta fyrr í kvöld. AFP/Joe Raedle

Donald Trump er kominn til Atlanta í Georgíuríki Bandaríkjanna til að gefa sig fram til lögreglu í Atlanta. Er búið að handtaka hann í fjórða sinn, og hafa fangelsismálayfirvöld gefið það út að tekin verði af honum fingraför og sakborningsmynd smellt af honum, áður en Trump gefst kostur til að lýsa sig sekan eða saklausan af þeim sakargiftum sem bornar hafa verið á hann.

Trump yfirgaf Bedminister golfklúbbinn sinn í New Jersey-ríki fyrr í kvöld en hann sagði fyrr í kvöld að hann yrði handtekinn í Fulton-fangelsinu í Atlanta kl. 19:30 að staðartíma, eða um kl. 23:30 að íslenskum tíma. Verður hann í kjölfarið látinn laus gegn tryggingu sem dómari hefur ákveðið að nemi 200.000 bandaríkjadölum, eða sem nemur rúmum 26,4 milljónum íslenskra króna.

Gert er ráð fyrir mótmælendum frá bæði stuðningsmönnum og andstæðingum Trumps fyrir utan Fulton-fangelsið í kvöld. AFP/Christian Monterrosa

Þetta er fjórða ákæran sem Trump yfir höfði sér en í Georgíuríki er hann ákærður, ásamt 18 öðrum, fyrir að hafa reynt að snúa við úrslitum forsetakosninganna 2020. Trump hefur einnig verið ákærður í Flórída-ríki, New York-ríki og í Washington-borg. Þegar allir ákæruliðir í ákærunum fjórum eru lagðir saman eru þeir 91 talsins.

Frétt af mbl.is

Á sér enga undankomuleið í Georgíu

Reyna að komast hjá sakborningsmyndatöku

Fógetinn í Fulton-sýslu hefur gefið það út að ekki verði komið fram við Trump á annan hátt en aðra sakborninga og því er fastlega gert ráð fyrir því að tekin verði sakborningsmynd (e. mugshot) af Trump.

Samkvæmt heimildum CNN þá vinna þó lögmenn forsetans fyrrverandi hörðum höndum að því að komist verði hjá því. Aðrir sakborningar viðriðnir málið hafa þó verið teknir í slíka myndatöku.

Fjöldi fólks hefur þegar safnast saman fyrir utan Fulton-fangelsið og er hægt að fylgjast með framvindu mála í beinu streymi hér: