„Erum ekki að stela auðlindum“

Ross Beaty, forstjóri Magma Energy
Ross Beaty, forstjóri Magma Energy

„Það getur verið erfitt að eiga við vinstri-græn stjórnvöld, sem vilja af hugmyndafræðilegum ástæðum ekki að erlendir aðilar fjárfesti í auðlindum landsins,“ sagði Ross Beaty, forstjóri Magma Energy, í ræðu á ráðstefnu Capacent Glacier sem nú stendur yfir á Grand Hotel.

Beaty fór í fyrirlestri sínum yfir ástæður þess að Magma ákvað að fjárfesta í HS Orku. Sagði hann fyrirtækið hafa stefnt að því að verða mjög stórt á heimsmælikvarða í jarðvarma, og væri litið á fjárfestingar hér á landi sem langtímaverkefni.

Ráðherrar bæti viðmótið

Aðspurður sagði Beaty að það fyrsta sem hann myndi gera sem íslenskur ráðherra væri að bæta viðmótið gagnvart erlendum fjárfestum. Viðmótið sem fyrirtækið fékk í sumar vegna þátttöku þeirra í íslenskum jarðvarmaiðnaði hafi verið neikvætt og reynt mikið á hann, enda hafði hann ekki í hyggju að komast upp á kant við íslenska þjóð.

Hann sagði ekki rétt að Magma væri komið hingað Íslands til að stela auðlindum landsins, eins og hefði mátt skilja af viðbrögðum fjármálaráðherra í fjölmiðlum í sumar. Verðið sem þau greiddu til að fá afnot af auðlindum landsins þætti mörgum meira að segja undarlega hátt.

„Það besta við Ísland er frábær mannauður“, sagði Beaty. Hann sagðist ekki vera í vafa um að Ísland kæmist út úr þeirri efnahagslægð sem gengur yfir þjóðina, og að Magma vildi taka þátt í uppbyggingunni með því að koma með fjármagn til landsins.

mbl.is