Innlent | mbl | 31.1.2018 | 11:08 | Uppfært 11:45

Fráleitt að ráðherra þurfi að fara að ráðum sérfræðinga

Ráðherra telur að hún hafi ekki þurft að fara eftir ráðlegginum sérfræðinga í ráðuneytinu. mbl.is/Kristinn Magnússon

Sigíður Á. Andersen dómsmálaráðherra segir fráleitt að henni hafi borið að fara eftir ráðleggingum sérfræðinga í dóms- og fjármálaráðuneytinu sem höfðu efasemdir um að ráðherra hefði innt af hendi rannsóknarskyldu sína þegar hún gerði tillögur að skipan dómara við Landsrétt. Sigríður vék frá mati sérstakrar hæfnisnefndar sem mat 15 umsækjendur um dómarstöður hæfasta, en hún gerði 4 breytingar þegar hún skipaði í stöðurnar.

„Þó einhverjir stafsmenn í ráðuneytinu hafi viðrað sín sjónarmið, þá er fráleitt að ráðherra beri að fara eftir ráðleggingum sérfræðinga í þessu,“ sagði Sigríður á fundi stjórnskipunar- og eftirlitsnefndar í morgun.

Dómsmálaráðherra situr nú fyrir svörum á fundi nefndarinnar þar sem rætt er um ákvarðanir dómsmálaráðherra og verklag við vinnslu tillögu Alþingis um skipan dómara í Landsrétt.

Frétt af mbl.is

Var tilneydd til að gera breytingar

Fram hefur komið að sérfræðingar í dóms- og fjármálaráðuneytinu vöruðu Sigríði Á. Andersen dómsmálaráðherra við því að ef hún ætlaði að breyta út af lista hæfnisnefndar um dómara við Landsrétt þyrfti hún að leggja sjálfstætt mat á alla umsækjendur.

Meðal þeirra sem vöruðu Sigríði við var Ragnhildur Arnljótsdóttir, settur ráðuneytisstjóri í dómsmálaráðuneytinu. Hún taldi skorta á rökstuðning Sigríðar og mælti með því að ráðherrann legði breytingar í hendur Alþingis eða frestaði skipan dómara.

Jón Steindór spurði hvort það hefði ekki verið rétt af ráðherra að upplýsa þingið um að efasemdir væru um meðferð málsins innan ráðuneytisins. Kristinn Magnússon

Jón Steindór Valdimarsson, þingmaður Viðreisnar, spurði Sigríði hvort eftir á að hyggja það hefði ekki verið rétt af ráðherra að upplýsa þingmenn, samstarfsflokka og nefndir um að það væru verulegar efasemdir innan hans ráðuneytis um meðferð málsins. Það hefði kannski haf áhrif á afgreiðslu málsins á Alþingi.

„Hefði ekki verið rétt og skylt að upplýsa þingið þær viðvaranir sem hún fékk um meðferð málsins?“ spurði Jón Steindór.

Sigríður sagði að það væri ekki rétt lýsing að komið hefðu upp verulegar efasemdir um að rannsókarskylda hefði verið innt að hendi. Hún sagði þau sjónarmið hafa komið upp að hún hefði þurft að bera saman alla umsækjendur líkt og nefndin gerði. Slíkur samanburður hefði hins vegar legið fyrir í umsögn hæfnisnefndarinnar og sagðist hún því hafa talið rétt að nýta hana.