Björgunarsveitir víða um land hafa staðið í ströngu frá því klukkan fimm í morgun þegar veginum milli Hvolsvallar og Jökulsárlóns var lokað. Núna er mesti þunginn í starfi björgunarsveitanna í uppsveitum Árnessýslu en allflestir vegir þar eru lokaðir.
Björgunarsveitir eru þar að störfum en kallað var á fjóra hópa björgunarsveita úr Reykjavík til viðbótar á þetta svæði til aðstoðar, að sögn Davíðs Más Bjarnasonar upplýsingafulltrúa Landsbjargar. Þar eru margir bílar fastir.
Frá því morgun hafa um 130 björgunarsveitarmenn sinnt útköllum. Eftir hádegi í dag voru um 80 menn að sinna hinum ýmsu verkefnum í um 56 hópum víða um land.
„Kosturinn við skipulagið hjá okkur er að rúmlega 4.000 manns eru á útkallsskrá og svo það er hægt að hvíla mannskapinn og kalla aðra út í staðinn,“ segir Davíð og tekur fram að samstarf milli sveitanna sé mjög gott.
Mikill álagspunktur var í kringum hádegið í dag. Skömmu eftir að fjöldi bíla sem festust í Þrengslunum og björgunarsveitarmenn fóru til aðstoðar lentu margir ökumenn í vandræðum milli Hveragerðis og Selfoss. Í kjölfarið var þeim vegi lokað.
Þar sem bæði Hellisheiðin og Þrengslin voru lokuð héldu nokkrir ökumenn Suðurstrandarveginn en þar var einnig slæmt skyggni og var þeim vegi var einnig lokað.
Í Þrengslunum er búið að koma farþegunum til aðstoðar sem voru fastir þar, að sögn Davíðs.
Í dag hefur einnig mikið mætt á björgunarsveitinni í Vík í Mýrdal en þar fuku meðal annars þakplötur og bílar fuku.
Ökumenn í Fljótshlíðinni við Hvolsvöll lentu í miklum vandræðum í morgun. Björgunarsveitirnar komu þá til aðstoðar. Enginn skólabíll ók börnum úr sveitunum í kring í grunnskólann á Hvolsvöll í dag vegna veðurs. Davíð bendir á að þar sem veginum milli Hvolsvallar og Jökulsárslóns var lokað snemma í morgun hafi fá útköll borist á því svæði og skynsamlegt að taka þá ákvörðun.
Á tíunda tímanum í morgun var keyrt á kyrrstæðan björgunarsveitarbíl með blikkandi ljós því hann lokaði veginum á Hellisheiði. Þrír voru fluttir á sjúkrahús en meiðsl þeirra eru ekki talin alvarleg.