Rannsókn lögreglunnar á Suðurlandi á máli manns sem grunaður er um að hafa orðið bróður sínum að bana á bæ hans í uppsveitum Árnessýslu er enn í fullum gangi. Elís Kjartansson lögreglufulltrúi hjá lögreglunni á Suðurlandi segir rannsóknina enn í gangi, en auk þess sé lögregla að bíða gagna erlendis frá, m.a. vegna krufningar.
Landsréttur staðfesti í síðustu viku úrskurð Héraðsdóms Suðurlands sem úrskurðaði manninn í gæsluvarðhald til mánudagsins 7. maí.
„Ég á von á að þetta gangi fljótt og vel fyrir sig þegar að gögnin koma til landsins og að málið verði sent héraðssaksóknara á næstu vikum,“ segir Elís og kveður manninn sitja í gæsluvarðhaldi á grundvelli almannahagsmuna.