Gjaldið verst fyrir minni fyrirtæki

Steinþór Ólafsson segir gjaldtöku á ytri stæðum við Leifsstöð koma …
Steinþór Ólafsson segir gjaldtöku á ytri stæðum við Leifsstöð koma niður á rekstri smærri fyrirtækja. mbl.is/Sigurður Bogi Sævarsson

„Þetta hefur miklu alvarlegri áhrif á rekstur smárra fyrirtækja, þessi aðgangseyrir. Þetta skekkir mjög alla eðlilega og heiðarlega samkeppni,“ segir Steinþór Ólafsson, eigandi ferðaþjónustunnar Steinferðir ehf.

Steinþór segist hafa þurft að hætta ferðum sínum upp á Leifsstöð til að sækja viðskiptavini eftir að Isavia lagði gjald á afnot af ytri rútustæðum við flugvöllinn. „Ytri stæðin hafa alla tíð verið gjaldfrjáls og hugsuð fyrir fyrirtæki sem eru þarna til að sækja einstaka hópa. Ég fann verulega fyrir því þegar þetta gjald kom og það var íþyngjandi,“ segir Steinþór. 

„Maður verður of dýr þegar maður ætlar að fara leggja þetta ofaná og ég er bara kominn út af markaðnum. Stóru fyrirtækin eiga eflaust auðveldara með að leggja þetta á kúnnann en það á ekki við um mig þannig þetta hefur haft veruleg áhrif á mína samkeppnisaðstöðu.“

Sam­keppnis­eft­ir­litið tók á þriðjudag bráðabirgðaákvörðun þar sem Isa­via ohf. var gert að stöðva tíma­bundið gjald­töku á ytri rútu­stæðum (fjar­stæðum) við Leifs­stöð. Gjald­taka Isa­via hófst á fjar­stæðunum í byrj­un mars síðastliðnum en síðan þá hef­ur Isa­via rukkað 12.900 krón­ur af hverri rútu­ferð sem er sam­kvæmt Isa­via af­slátt­ar­gjald af 19.900 krón­um.

Tvö rútu­fyr­ir­tæki, Kynn­is­ferðir og Hóp­bíl­ar, hafa þó af­not af innri stæðum eft­ir að rétt­ur­inn um af­not á þeim var boðinn út á síðasta ári. Þá buðu Kynn­is­ferðir rúm­lega 40% af þeim tekj­um sem fyr­ir­tækið fær af ferðum sín­um frá Leifs­stöð fyr­ir notk­un stæðanna.

Steinþór segir umræðu um gjaldtöku á ytri stæðunum ekki hafa verið á milli Isavia og rútufyrirtækja áður en útboðið á innri stæðunum fór fram. „Þetta hafði ekki verið í neinni umræðu. Við fengum ekkert að vita þetta fyrr en eftir síðasta útboð á innri stæðunum. Þá bauð Allrahanda (Grayline) ekki nægilega hátt í stæðin og ákvað að nota ytri stæðin endurgjaldslaust. Þá kemur Isavia með þetta gjald eins og einhverskonar hefndarráðstöfun gegn Grayline og það bitnar á öllum hinum. Minni fyrirtækjunum.“

Þá segist Steinþór hafa tekið eftir því að sífellt færri minni rútufyrirtæki hafi haft tök á því að sækja farþega á Leifsstöð eftir að gjaldið var sett á stæðin. Sjálfur hafi hann þurft að skipta um viðskiptahóp þar sem það gekk ekki lengur upp fyrir fyrirtæki hans að fara í ferðir þar sem viðskiptavinir eru ferjaðir fram og tilbaka frá flugvellinum líkt og hann hefur ætíð gert.

Úrskurður Samkeppniseftirlitsins gildir út árið og þá má gera ráð fyrir því að gjaldið verði annað hvort lækkað eða afnumið. Aðspurður segir Steinþór klárlega ætla að hefja ferðir til og frá Leifsstöð aftur, fari svo að gjaldið verði afnumið.

mbl.is
Fleira áhugavert
Fleira áhugavert