Fyrirkomulag Reykjavíkurborgar um ákvörðun um útleigu Iðnó á síðasta ári var ekki fyllilega í samræmi við sjónarmið um vandaða stjórnsýsluhætti að mati umboðsmanns borgarbúa.
Í áliti um málið er rakið að betur hafi mátt huga að undirbúningi ákvörðunarinnar, einkum að því er varðar samanburð á þeim umsóknum sem bárust og rökstuðningi ákvörðunarinnar.
Taldi umboðsmaður að þeir matsþættir sem lagðir voru til grundvallar við val á leigjanda hafi ekki verið skilgreindir eins og kostur var og því óljóst hvaða atriði réðu endanlega úrslitum um valið. Í umfjöllun um mál þetta í Morgunblaðinu í dag segir að kvartandinn, Margrét Rósa Einarsdóttir, hafði rekið Iðnó gegnum félag í sinni eigu frá árinu 2001. Samkvæmt ákvörðun menningar- og ferðamálaráðs var reksturinn falinn öðrum aðilum.