Lögreglunni á höfuðborgarsvæðinu barst á tíunda tímanum í gærkvöldi tilkynning um hóp erlendra ferðamanna sem höfðu orðið strandaglópar í Gróttu eftir að flæddi að.
Fólkið var að skoða norðurljósin og áttaði sig ekki á sjávarföllunum. Björgunarsveit kom með bát og ferjaði fólkið í land að því er segir í dagbók lögreglu.
Þá hafði lögregla afskipti af ofurölvi erlendum ferðamanni við Alþingishúsið um áttaleytið í gærkvöldi. Maðurinn gat ekki gert grein fyrir sér, né heldur hvar hann gisti og fékk því að sofa úr sér í fangageymslu lögreglu.