Mikill stormur gengur nú yfir stóran hluta lands og var meðalvindhraði á Suðausturlandinu víða 20-25 m/s í morgunsárið og átti enn eftir að bæta í sums staðar.
Á vefnum Eyjar.net er bent á að meðalvindhraðinn á Stórhöfðastöðinni hafi í gærkvöldi mælst mestur 32 m/s og sterkustu vindhviðurnar 42 m/s. Veðrið átti svo að ná hámarki nú í morgunsárið, en engar mælingar hafi hins vegar borist frá stöðinni á Stórhöfða frá því klukkan þrjú í nótt.
„Spurningin er hvort mælirinn hafi bilað eða hreinlega fokið í veðurofsanum?“ spyrja þeir á Eyjar.net.
Samkvæmt upplýsingum Veðurstofunnar verður þó að teljast mjög ólíklegt að mælirinn hafi fokið. Vera kunni hins vegar að hann hafi bilað, en eins eigi hann það til að detta út.