Mjólkurfræðingafélag Íslands heldur á fund hjá ríkissáttasemjara á morgun en félagið vísaði viðræðum sínum um nýjan kjarasamning við Samtök atvinnulífsins til ríkissáttasemjara um miðjan mars sl.
Í samtali við mbl.is segir Eiríkur Ingvarsson formaður að beðið hafi verið eftir því að iðnaðarmenn myndu semja. Þar sem því sé nú lokið hafi mjólkurfræðingar fengið samningsdrög í hendurnar og hafa verið að fara yfir málin. Eiríkur hljómar nokkuð vongóður og telur líklegt að línur fari að skýrast á næstu dögum.