Óvissustig vegna hættu á gróðureldum

Óvissustigi vegna hættu á gróðureldum hefur verið lýst yfir á Vesturlandi. Jafnframt hefur viðbragðsáætlun vegna gróðurelda í Skorradal verið virkjuð.

Vegna langvarandi þurrka á Vesturlandi hefur ríkislögreglustjóri í samráði við lögreglustjórann á Vesturlandi lýst yfir óvissustigi almannavarna vegna hættu á gróðureldum. Sérstaklega er litið til Skorradals þar sem mikil sumarhúsabyggð er í skógi og þröng aðkoma. Ekki er búist við úrkomu á svæðinu í þessari eða næstu viku en áframhaldandi hlýindum.

Pétur Davíðsson, bóndi á Grund og fulltrúi í sveitarstjórn Skorradalshrepps, segir að ekki hafi rignt frá 10. maí og gróður og jarðvegur orðinn mjög þurr. Hættuástand skapaðist ef glóð kæmist í sinu í norðanáttinni. Pétur telur rétt að slökkviliðið setji á vakt í helstu sumarhúsahverfum eða fari þar um á slökkviliðsbílum. Það myndi vekja fólk til umhugsunar um hættuna.