Sveinbjörn ráðinn forstjóri Isavia

Sveinbjörn Indriðason hefur verið ráðinn forstjóri Isavia.
Sveinbjörn Indriðason hefur verið ráðinn forstjóri Isavia. Ljósmynd/Aðsend

Stjórn Isavia hefur ráðið Sveinbjörn Indriðason í starf forstjóra Isavia og tekur hann strax við starfinu, sem hann hefur gegnt undanfarna mánuði ásamt Elínu Árnadóttur aðstoðarforstjóra. Þetta kemur fram í tilkynningu.

„Sveinbjörn hefur á síðustu mánuðum sýnt mikla leiðtogahæfileika sem starfandi forstjóri Isavia. Hann hefur mikla reynslu og þekkingu á fyrirtækinu – og hefur um leið slegið nýjan tón. Það eru fjölmargar áskoranir framundan og mikilvægt að stýrt sé af festu og ábyrgð. Við treystum Sveinbirni afar vel til þeirra verka. Um leið viljum við þakka þeim fjölmörgu hæfu umsækjendum sem sóttu um starfið og þann áhuga sem þeir sýndu,“ segir Orri Hauksson, stjórnarformaður Isavia, í tilkynningunni.

„Ég þakka það traust sem mér er sýnt með ráðningunni,“ segir Sveinbjörn. „Starfið er mjög spennandi og framundan margvísleg verkefni. Hjá Isavia starfar margt hæfileikaríkt og gott starfsfólk sem ég hlakka til að vinna með áfram. Isavia er mikilvægt fyrirtæki fyrir íslenskt samfélag og brýnt að reksturinn sé stöðugur til framtíðar.“

Umsækjendur um starf forstjóra Isavia voru 26. Ráðningarstofan Intellecta var fengin til að annast ráðningarferlið.

mbl.is