Grindhvalur strand við Voga

Maður í morgungöngu í Vogum á Vatnsleysuströnd kom auga á grindhval í fjörunni þar á níunda tímanum í morgun. Íbúar á staðnum hafa tekið sig saman um að halda honum rökum í von um að hægt verði að koma honum á flot er flæðir að í kvöld.

Berglind Drífa Pétursdóttir, íbúi í Vogum, segir í samtali við mbl.is að getgátur séu uppi um að mögulega sé þessi hvalur úr vöðunni sem hljóp á land við Garð í gærkvöldi.

Frétt af mbl.is

Björguðu um þrjátíu hvölum úr fjörunni

„Nú er bara komin alveg fjara og það verður bara að bíða eftir að það komi flóð aftur svo að það sé einhver séns á að koma honum út,“ segir Berglind.

Hún segir lögreglu hafa komið á staðinn í morgun og að björgunarsveitarfólk sé núna einnig mætt á svæðið.

Berglind segir að íbúar í Vogum hafi séð til grindhvalavöðu „of nærri landi“ fyrr í dag, en hún hafði ekki orðið vör við hvalina sjálf.

• Blogga um frétt