Skipulag lögreglu hefur gengið sér til húðar og sameina á öll lögregluembættin í landinu að sögn Jóns F. Bjartmarz, yfirlögregluþjóns hjá embætti ríkislögreglustjóra. Hann segir að þannig væri hægt að koma í veg fyrir togstreitu og átök um fjármuni og að ekki sé til fé til að standast gæðakröfur.
Þetta kom fram í viðtali RÚV við hann í kvöld, en Jón vonast til þess að innan þriggja ára verði lögreglan orðin ein stofnun.
Stjórn Landssambands lögreglumanna lýsti þeirri skoðun í dag að ákvörðun dómsmálaráðuneytis um að fara fram á alhliða stjórnsýsluúttekt á embætti ríkislögreglustjóra væri löngu tímabær. „Um langt skeið hefur ríkt mikil óánægja meðal lögreglumanna með störf yfirstjórnar embættis ríkislögreglustjóra,“ sagði í ályktun sem stjórnin sendi frá sér.
Fram kemur að óánægjan sé m.a. til komin vegna fatamála lögreglumanna sem hafi verið í ólestri en einnig vegna annarra mála, s.s. bílamála. „Ljóst er að lögregluembætti hafa þurft að greiða háar fjárhæðir til bílamiðstöðvar ríkislögreglustjóra vegna ökutækja lögreglu, þrátt fyrir að þau séu jafnvel úr sér gengin, sbr. fréttir undanfarna daga. Einnig hafa málefni sérsveitar ríkislögreglustjóra verið til umfjöllunar og styður stjórn Landssambands lögreglumanna erindi þeirra sérsveitarmanna sem sent var dómsmálaráðaneyti til umfjöllunar,“ segir í ályktun stjórnarinnar.
Embætti ríkislögreglustjóra lýsti yfir furðu á yfirlýsingu landssambandsins og meðal annars kom fram að stjórn landssambandsins hefði ekki haft neitt samband við embætti ríkislögreglustjóra til að ræða áhyggjurnar eða sett fram nokkur umkvörtunarefni.
„Landssamband lögreglumanna á fulltrúa bæði í fata- og búnaðarnefnd og bílanefnd embættisins og hefur formaðurinn meðal annarra sjálfur setið í þeim. Fulltrúi landssambandsins hefur unnið með embættinu að útboði á einkennisfatnaði fyrir lögreglumenn sem birtast mun innan skamms. Þegar liggur fyrir að bílamiðstöð verður lögð niður og mikilvægt er að nýtt fyrirkomulag tryggi að áfram verði keypt traust og öflug lögregluökutæki,“ segir í athugasemd ríkislögreglustjóra.
„Ríkislögreglustjóri hafði sjálfur frumkvæði að því að óska eftir því við ríkisendurskoðanda að fram færi úttekt á bílamiðstöð og áhrifum þeirra breytinga sem ný lög um opinber fjárlög hafa haft á reksturinn. Ríkislögreglustjóri telur að tímabært sé að hugað verði að framtíðarskipan lögreglu og skynsamlegt væri að stjórnsýsluúttekt ríkisendurskoðanda myndi beinast að heildarendurskoðun lögreglumála í landinu,“ segir ennfremur.