„UNICEF á Íslandi lýsir yfir þungum áhyggjum af stöðu mála í norðurhluta Sýrlands og þeim átökum sem þar eru farin af stað,“ segir Bergsteinn Jónsson, framkvæmdastjóri UNICEF á Íslandi.

UNICEF, Barnahjálp Sameinuðu þjóðanna, skorar á alla sem að átökunum koma að setja velferð og öryggi barna í algjöran forgang í samræmi við alþjóðlega mannréttindasáttmála og lög. Ljóst er að sprengjuárásir á byggðir munu setja börn í óásættanlega hættu og valda mannfalli, að því er UNICEF segir í tilkynningu.

Stríðsátök bitna ávallt mest á þeim sem minnst mega sín. Ljósmynd/UNICEF

„Það verður aldrei sagt nógu oft að börn í Sýrlandi bera enga ábyrgð á þessum stríðsátökum en eins og við vitum þá verða það fyrst og fremst þau sem munu þjást af þeirra völdum. Það er nóg komið af blóðbaði. Íslendingar eiga að segja stopp og saman getum við haft áhrif,“ segir Bergsteinn ennfremur.

Eins og fram hefur komið í fréttum hófu tyrkneskir hermenn innrás sína í norðausturhluta Sýrlands í gær með loftárásum á borgir og bæi við landamæri Tyrklands og Sýrlands og hafið þar landhernað. Innrásin hefur verið fordæmd af þjóðarleiðtogum víðs vegar um heiminn og Tyrkir hvattir til að gæta ítrustu varúðar í aðgerðum sínum sem að sögn forseta landsins miða að því að ráða niðurlögum Íslamska ríkisins. UNICEF hefur ítrekað þá afstöðu sína að leitað verði friðsamlegra lausna til að leysa málin. 

Tengdar fréttir

Sýrland

Helsti ráðgjafi Hisbollah sá sem ráðinn var af dögum

• Fórnarlömb mannskæðrar árásar jörðuð
• Olíuflutningaskipið sagt mjög laskað
• Vill réttarhöld yfir Assad
• Jórdanar sagðir hafa fellt fíkniefnabarón

» Fleiri tengdar fréttir

• Blogga um frétt