Sigurður Örn Hilmarsson, lögmaður Freyju Haraldsdóttur, segir niðurstöðu Hæstaréttar í máli hennar gegn Barnaverndarstofu sérstaklega ánægjulega. „Bæði fyrir Freyju sem og hygg ég annað fatlað fólk í landinu að réttindi þeirra séu viðurkennd fyrir æðsta dómstól landsins,“ segir Sigurður í samtali við mbl.is. Dómurinn er fordæmisgefandi að hans mati.
Hæstiréttur Íslands staðfesti í morgun dóm Landsréttar í máli Freyju gegn Barnaverndarstofu sem komst að því í mars að Freyju hafi verið mismunað vegna fötlunar. Fyrir fjórum árum hafnaði barnavernd umsókn Freyju um leyfi til þess að taka barn í varanlegt fóstur.
Héraðsdómur Reykjavíkur hafði áður hafnað kröfum Freyju um að fella úr gildi úrskurð úrskurðarnefndar velferðarmála frá 6. júní 2016 þar sem staðfest var ákvörðun Barnaverndarstofu frá nóvember 2015 um synjun á umsókn Freyju um leyfi til þess að taka barn í fóstur.
„Það er að sjálfsögðu synd að málið hafi þurft að fara svona langt og tekið fimm ár af ævi hennar Freyju að standa á sínum rétti að vera ekki mismunað út af fötlun hennar,“ segir Sigurður og bæti við að sú niðurstaða og afstaða hafi í raun verið staðfest af Hæstarétti í dag.
Sigurður segir augljóst að dómurinn sé fordæmisgefandi. „Hann er það og það er sérstaklega tekið fram í niðurstöðu dómsins að það er verið að gæta jafnræðisreglu og gæta að því að fólki sé ekki mismunað og þá sérstaklega fötluðu fólki í samræmi við markmið laga um málefni fatlaðs fólks.“
Freyja á nú rétt á hefðbundnu matsferli varðandi umsókn sína um að verða fósturforeldri. „Núna fer hún í hefðbundið ferli sem hún átti rétt á fyrir fimm árum síðan og ég vænti þess að það gangi eðlilega fyrir sig og að hún þurfi ekki á sérstakri lögmannsaðstoð að halda frekar en aðrir umsækjendur um að verða fósturforeldrar. En við erum reiðubúin að grípa inn í ef á þarf að halda,“ segir Sigurður.