Lögreglunni á Suðurlandi barst tilkynning laust eftir klukkan þrjú í dag þess efnis að rjúpnaveiðimaður hefði orðið fyrir slysaskoti í Eldhrauni skammt vestan við Kirkjubæjarklaustur. Hafnaði skotið í öðrum fæti mannsin og voru áverkarnir alvarlegir.
Veiðifélagar mannsins kölluðu eftir aðstoð og veittu hinum slasaða, karlmanni á sjötugsaldri, fyrstu hjálp og sýndu hárrétt viðbrögð við slysinu.
Maðurinn var með meðvitund allan tímann og var fluttur á heilsugæsluna á Kirkjubæjarklaustri en þar mat læknir áverkana á fæti mannsins það alvarlega að kallað var eftir aðstoð þyrlu Landhelgisgæslunnar.
Hinn slasaði var fluttur með sjúkrabifreið til móts við þyrluna á flugvöllinn austan við Vík í Mýrdal um klukkan fjögur. Þaðan var flogið með hann á Landspítalann í Fossvogi.