Lyfjanotkun megi ekki leiða til skertra tækifæra
Setja bókamerki
Áslaug Arna Sigurbjörnsdóttir dómsmálaráðherra segir að hún muni beina því til embættis ríkislögreglustjóra að skoða þau viðmið sem stuðst er við varðandi inngöngu í starfsnám í lögreglufræðum við Háskólann á Akureyri.
„Þau verður að setja í nútímalegra horf,“ segir, dómsmálaráðherra í færslu á Facebook, en tilefni skrifa hennar er umfjöllun um mál Ólafíu Kristínar Norðfjörð, fyrsta árs nemanda í lögreglufræðum við Háskólann á Akureyri, sem fékk ekki inngöngu í starfsnámið vegna inntöku kvíðalyfja.
„Mikil vitundavakning hefur átt sér stað í samfélaginu hvað varðar andleg veikindi á borð við þunglyndi og kvíða. Stigin hafa verið mörg framfaraskref í að auka þjónustu og bjóða upp á fjölbreyttari úrræði til að grípa fólk á fyrsta stigi vandans. Það að þurfa að notast við lyf á einhverjum tímapunkti má ekki verða til þess að viðkomandi njóti ekki sömu tækifæra og aðrir þegar kemur að menntun eða atvinnu,“ segir Áslaug Arna í færslu sinni.
Hún segir að hér verði að gæta sanngirni og að umsækjendur eigi rétt á einstaklingsbundnu mati hverju sinni. „Á það jafnt við hvort lyf séu tekin við kvíða eða þunglyndi, ADHD eða sykursýki, svo dæmi séu nefnd,“ skrifar ráðherra.
Hver umsækjandi þegar metinn
Í tilkynningu sem barst frá Mennta- og starfsþróunarsetri lögreglunnar (MSL) sem hefur umsjón með starfsnáminu, segir að hver einstaklingur sé metinn með tilliti til þess hvort læknisfræðileg einkenni kunni að vera hamlandi í lögreglustarfi eða ekki. Viðmiðin eigi sér stoð í lögreglulögum og taki mið af sambærilegum viðmiðum á Norðurlöndunum.
Þar segir einnig að læknisfræðilegt mat á umsækjendum sé alfarið í höndum trúnaðarlæknis MSL og að menntasetrið fái engin læknisfræðileg gögn eða ástæður fyrir því telji trúnaðarlæknir umsækjendur ekki uppfylla skilyrði.
Ljóst er af færslu ráðherra að hún telur þörf á því að taka þau viðmið sem eru notuð við matið til einhverrar endurskoðunar.
Sex hafa greinst með listeríu
Kostnaður meiri en milljón á fermetra
Handteknir eftir myndatöku í Vesturbæjarlaug
Gígbarmurinn hækkað frá því í gær
Banna mengandi búnað sem leyfður er á Íslandi
Telur forsendur fyrir vaxtalækkun
Skar höfuðleðrið af íslenskri konu
Tveir í bílnum sem lenti utan vegar