Snarpur jarðskjálfti varð á sprungu sem er á milli Hveragerðis og Selfoss fyrir skömmu.
Samkvæmt fyrstu tölum Veðurstofu Íslands var hann af stærðinni 3,7.
Að sögn sérfræðings á Veðurstofu Íslands hafa borist tilkynningar um að hann hafi fundist víða á Suðurlandi og á höfuðborgarsvæðinu.
Uppfært kl. 13.33:
Fram kemur í tilkynningu að skjálftinn, sem gekk yfir klukkan 13.10, hafi verið 3,9 að stærð á 8 km dýpi. Upptök hans voru um 4,5 kílómetrum suðsuðaustur af Hveragerði.
Nokkrir eftirskjálftar hafa mælst.
Uppfært kl. 13.53:
Að sögn Kristínar Elísu Guðmundsdóttur, náttúruvársérfræðings hjá Veðurstofu Íslands, hafa sjö litlir eftirskjálftar orðið.
Annar skjálfti, 3 að stærð, varð klukkan 11.19 í morgun undir Mýrdalsjökli og fylgdu honum engir eftirskjálftar. Kristín Elísa segir að skjálftar af þessari stærð verði reglulega á þessu svæði.
Skjálftarnir tveir tengjast ekkert innbyrðis.