„Við finnum fyrir auknum fyrirspurnum og auknum beiðnum,“ segir Bjarni Gíslason, framkvæmdastjóri Hjálparstarfs kirkjunnar.
Hann segist taka eftir erfiðri stöðu innflytjenda á Íslandi eftir að kórónuveirufaraldurinn skall á.
„Þeir sem ekki hafa rétta tengslanetið eru í erfiðri stöðu hvað varðar upplýsingar um ástandið á Íslandi,“ segir hann, enda búi innflytjendur ekki að sama stuðningsneti og Íslendingar.
„Innflytjendur koma til okkar og spyrja okkur út í stöðuna, um hvað sé leyfilegt og hvað ekki. Þeir þekkja kannski stöðuna betur í sínu heimalandi,“ segir hann í Morgunblaðinu í dag.
Skjólstæðingar Hjálparstarfs kirkjunnar gefa upp fjárhagsyfirlit svo unnt sé að meta stöðu þeirra, að sögn Bjarna. Séu þeir undir vissum fátæktarmörkum fái þeir inneignarkort í matvöruverslanir.