Tvö ný kórónuveirusmit hafa verið staðfest hjá starfsfólki á skólasvæði Háskóla Íslands. Þetta kemur fram í tilkynningu frá Jóni Atla Benediktssyni, rektor HÍ, sem send var nemendum og starfsfólki skólans í dag.
Smit hefur verið staðfest hjá starfsmanni í Setbergi – húsi kennslunnar og að auki við það smit hjá starfsmanni Hámu á háskólatorgi sem mbl.is greindi frá í gærkvöldi.
Að sögn Andra Ólafssonar, aðstoðarmanns rektors, hafa nokkrir starfsmenn þurft að fara í sóttkví í tengslum við smitið í Setbergi, auk þeirra sem fóru í sóttkví vegna smitsins í Hámu.
Hann gat ekki staðfest heildartölu starfsmanna sem hafa þurft að fara í sóttkví vegna smitanna, en einn nemandi hafi verið sendur í sóttkví í tengslum við smitið í Setbergi.
Andri segir, í samtali við mbl.is, að ekki standi til að breyta námsfyrirkomulagi er kemur að staðnámi eða hópavinnu. Atvikin séu ekki þess eðlis að þurfi að endurskoða slík mál.