Kveður sáttur eftir 40 ár

„Ég er kornungur eða mér líður alla vega þannig. En maður verður víst að pakka saman 65 ára og má ekki einu sinni fljúga á afmælisdaginn,“ segir Tryggvi Jónsson, flugstjóri hjá Air Iceland Connect.

Þegar Tryggvi lenti síðdegis í gær á Akureyrarflugvelli lauk starfsferli sem spannar um fjóra áratugi. Vinir og samstarfsmenn kvöddu Tryggva í heimabæ hans og þökkuðu honum samstarfið.

Tryggvi segir í samtali við Morgunblaðið að hann hafi klárað atvinnuflugmannsréttindin árið 1980 og „verið í þessu meira og minna síðan“. Hann starfaði hjá Flugfélagi Norðurlands þar til það var sameinað Flugfélagi Íslands árið 1997. Flugtímarnir eru orðnir tæplega 17 þúsund og áfangastaðirnir margir, segir Tryggvi í samtali um starfsflokin í Morgunblaðinuí dag.