550 milljónir í bóluefni til þróunarlanda

Bóluefni Pfizer/BioNTech.
Bóluefni Pfizer/BioNTech. AFP

Íslensk stjórnvöld hafa lagt um 550 milljónir króna til þróunar, framleiðslu og dreifingar bóluefna við Covid-19 í þróunarlöndum. Þetta kemur fram í fréttatilkynningu frá fjármálaráðuneytinu.

Að auki hefur Ísland ráðstafað um hálfum milljarði til annarra alþjóðlegra verkefna til að sporna gegn óbeinum áhrifum faraldursins.

250 af milljónunum 550 fóru til GAVI-samstarfsins um bóluefni til lág- og millitekjuríkja.

Á heimsfundi fjármálaráðherra á föstudag var rætt um þetta en þar kom skýrt fram að víðtæk bólusetning um allan heim væri arðbær fjárfesting enda forsenda endurreisnar heimsbúskaparins. 

„Framlag Íslands til bóluefna vegna Covid-19 byggist á alþjóðlega samstarfinu ACT-Accelerator (Access to Covid-19 Tools) sem hefur að markmiði að flýta þróun, framleiðslu og jöfnum aðgangi að skimunarbúnaði, meðferðum og bóluefni gegn sjúkdómnum. Að samstarfinu standa alþjóðastofnanir, ríkisstjórnir, einkageirinn og frjáls félagasamtök. Ísland er meðal þeirra ríkja sem hafa lagt hvað mest til þessa samstarfs ef litið er til stærðar hagkerfa eða fólksfjölda,“ segir í fyrrnefndri tilkynningu. 

Aukin byrði á efnaminni löndum vegna Covid-19

Þar kemur fram að íslensk stjórnvöld hafi lagt áherslu á mikilvægi alþjóðlegrar samvinnu um þróun og framleiðslu bóluefnis og jafns aðgengis ríkja óháð greiðslugetu þeirra.

Á fyrrnefndum fundi fjármálaráðherra kom fram af hálfu Íslands að þótt hér á landi fyndi fólk fyrir margvíslegum áhrifum faraldursins, til að mynda á efnahag landsins, tryggðu sterkir innviðir og góð staða ríkisfjármála varnir og viðspyrnu við honum. Hið sama væri ekki að segja um mörg efnaminni lönd, þar sem mikil söfnun skulda og aukin byrði af völdum þess blasir við vegna Covid-19. Af þeim sökum telja íslensk stjórnvöld það skyldu landsins að styðja við hnattrænar aðgerðir til að aðstoða og tryggja framgang heimsmarkmiðanna um sjálfbæra þróun.

„Á fundinum kom fram að allt að 27 milljarða Bandaríkjadala þurfi fyrir lok ársins 2021 frá efnameiri ríkjum til að stemma stigu við skuldasöfnun og aukinni skuldabyrði þróunarríkja vegna beinna og óbeinna áhrifa faraldursins. Til fundarins var boðað af fjármálaráðherrum Noregs og Suður-Afríku og var m.a. rætt um tæki og tól til þess að afla nægilegra fjármuna.“

mbl.is
Fleira áhugavert
Fleira áhugavert