Innlent | mbl | 14.4.2021 | 8:28 | Uppfært 10:07

Fimmta smitið í Öldutúnsskóla

Börn að leik í Öldutúnsskóla í Hafnarfirði. Ljósmynd/Sverrir Vilhelmsson

Hátt í 30 nemendur í fimmta bekk og þrír starfsmenn Öldutúnsskóla í Hafnarfirði eru komnir sóttkví eftir að kórónuveirusmit var staðfest síðdegis í gær hjá nemanda.

Að sögn Valdimars Víðissonar skólastjóra smitaðist barnið ekki í skólanum. Smitið tengist öðru smiti sem hafði áður komið þar upp.

Frétt af mbl.is

Sláandi að lenda í þessu aftur

Þetta er í fimmta sinn sem smit kemur upp í skólanum frá því í mars í fyrra. Í síðustu viku þurftu hátt í 70 manns að fara í sóttkví í skólanum og í lok mars um 200 manns eftir að smit kom upp.

„Það hefur gengið á ýmsu. Við erum orðin vel sjóuð í þessu verklagi hjá smitrakningarteyminu og þetta gengur nokkuð hratt fyrir sig. Við myndum gjarnan vilja vera án þess að vera í þessu en svona er þessi veruleiki í dag,“ segir Valdimar.

Allir sem eru í sóttkví fara í skimun mánudaginn 19. apríl. Fjölskyldum barna í viðkomandi bekkjum hefur verið gert viðvart um smitið og verða þau börn í sóttkví heima næstu daga.

Valdimar Víðisson skólastjóri Öldutúnsskóla.

Verði meira vakandi fyrir einkennum

Börn í öðrum bekkjum skólans eru ekki talin hafa verið berskjölduð fyrir smiti og þurfa því ekki að fara í sóttkví. Valdimar segir þessi mál erfið í 650 barna skóla og mikla ábyrgð fólgna í því að segja hverjir fari í sóttkví og hverjir ekki. Eftir rakningu var aftur á mótið talið að þessi hópur væri berskjaldaðastur.

„En við útilokum ekki að einhverjir snertifletir séu mögulega til staðar. Þess vegna sendum við á foreldra í skólanum að fara sérstaklega varlega, eins og segir í póstinum [sem skólastjóri sendi til foreldra] um að vera meira vakandi fyrir einkennum en ella,“ segir hann en vonar að búið sé að ná utan um hópinn sem talinn er berskjaldaðastur.