Tveir smitaðir heimilismenn í austurhúsi á hjúkrunarheimilinu Grund losna úr einangrun í vikulokin. Þeir hafa verið einkennalausir allan tímann.
Þetta kemur fram í tilkynningu.
Á Minni-Grund greindust fyrr í vikunni tveir heimilismenn með smit. Annar einkennalaus, hinn með nokkur einkenni.
Skimun útsettra heimilismanna er lokið og skimun viðeigandi starfsmanna stendur yfir. Allnokkrir starfsmenn eru í sóttkví.
Heimsóknarbann á Grund er í gildi í það minnsta fram yfir helgi.
Seinni skimun 33 heimilismanna og þeirra starfsmanna Áss sem voru settir í sóttkví í síðustu viku fer fram í dag. Einungis greindist eitt smit starfsmanns í síðustu viku. Enginn heimilismaður hefur greinst með smit, að því er segir í tilkynningunni.
Áfram verður lokað fyrir heimsóknir á hjúkrunarheimilið en gera má ráð fyrir afléttingu heimsóknarbanns að fengnum niðurstöðum seinni skimunar.