Guðni Th. Jóhannesson, forseti Íslands, vekur á facebooksíðu sinni athygli á alþjóðlega Alzheimerdeginum sem er í dag.
Eliza Reid forsetafrú er verndari Alzheimersamtakanna á Íslandi.
„Sjálfur stuðlaði ég að því á sínum tíma að buff merkt þeim seldust vel, klæddist einu slíku haustið 2016 hér úti á Bessastaðanesi, í svipuðu veðri og nú geisar,” skrifar Guðni en myndina tók Sigurður Bogi Sævarsson, blaðamaður á Morgunblaðinu.
Guðni minnist einnig á málþing sem hann sótti í Þjóðleikhúsinu í tengslum við sýninguna Vertu úlfur og bætir við að þau hjónin hafi skemmt sér vel á söngleiknum Níu líf.
„Mikið er gott að geta aftur sótt listviðburði, íþróttaleiki og aðrar samkomur nær hömlulaust. Þetta er allt að koma,” skrifar forsetinn.