Landris líklega vegna kvikusöfnunar

Virkni í gígnum í Geldingadölum hefur legið niðri í tvo …
Virkni í gígnum í Geldingadölum hefur legið niðri í tvo mánuði. mbl.is/Sigurður Bogi

Ekki hefur sést í hraunflæði frá gígnum í Fagradalsfjalli frá 18. september til dagsins í dag, eða í tvo mánuði. Enn mælist gas en í mjög litlu magni.

Fram kemur í tilkynningu frá Veðurstofu Íslands að samfara eldgosinu seig land umhverfis eldstöðvarnar líkast til vegna kviku sem streymdi úr kvikugeymi.

Í lok ágúst sást á GPS-mælum að farið var að draga úr siginu og upp úr miðjum september var það farið að snúast í landris. Risið er mjög lítið, eða um 2 sentímetrar þar sem það er mest. Nýjustu gervitunglagögn sýna að landrisið nær norður af Keili og suður fyrir gosstöðvarnar. Upptökin eru talin vera á miklu dýpi og er kvikusöfnun talin líklegasta skýringin.

„Ekki er ólíklegt að kröftug jarðskjálftahrina sem hófst í lok september við suðurenda Keilis og stóð yfir í um mánuð, tengist landrisinu, þó engin aflögun á yfirborði hafi sést í tengslum við þá hrinu, sem væri merki um að kvika hafi færst nær yfirborðinu,“ segir í tilkynningunni.

Fram kemur að ekki sé óalgengt að kvikusöfnun eigi sér stað undir eldstöðvakerfum eftir eldgos. Landrisið þurfi því ekki að vera vísbending um að kvika leiti til yfirborðs á  næstunni. Þetta sé hugsanlega atburðarás sem taki ár eða áratugi og að erfitt sé að spá fyrir um framvinduna.

mbl.is