Ýmislegt sem þarf að bæta á HSS

Heilbrigðisstofnun Suðurnesja.
Heilbrigðisstofnun Suðurnesja. mbl.is/Sigurður Bogi

Umbótastarf er þegar hafið á Heilbrigðisstofnun Suðurnesja (HSS) og hefur starfsumhverfi legudeildar D á HSS tekið jákvæðum breytingum á síðustu mánuðum. Hins vegar er ljóst að ýmislegt þarf að bæta að sögn embætti landlæknis.

Fram kemur á vef landlæknis, að hlutaúttekt á deildinni hafi verið í kjölfar rannsóknar embættisins á kvörtun sem barst síðla árs 2019 og leiddi í ljós alvarlega annmarka á þjónustu. Úttektin var gerð í september og tók til vettvangsskoðunar, viðtala við starfsfólk, stjórnendur og sjúklinga ásamt skoðunar á ferlum og fyrirliggjandi gögnum um starfsemi, alvarleg atvik, ábendingar, kvartanir og fleira.

Alma Möller landlæknir. Samkvæmt lögum um landlækni og lýðheilsu ber …
Alma Möller landlæknir. Samkvæmt lögum um landlækni og lýðheilsu ber embætti landlæknis að fylgjast með gæðum og öryggi heilbrigðisþjónustunnar og stuðla að umbótum. mbl.is/Eggert Jóhannesson

Fjölga þarf læknum og efla þarf þekkingu og innra eftirlit

Sem fyrr segir þá er umbótastarf hafið á HSS en landlæknisembættið hefur m.a. sent frá sér eftirfarandi ábendingar um atriði sem þarf að bæta.

  1. Fjölga þarf læknum til að stuðla að stöðugri mönnun og samfelldri þjónustu.
  2. Setja þarf fram skýr markmið og skýra stefnumörkun fyrir starfsemi deildarinnar. Tryggja þarf að búnaður sé í samræmi við það þjónustustig sem ætlað er að uppfylla á deildinni.
  3. Efla þarf þekkingu og þjálfun starfsmanna til að sinna líknar- og lífslokameðferð samkvæmt nýjustu þekkingu hverju sinni t.d. með námskeiðum og stuðningi frá líknarráðgjafateymi Land­spítala.
  4. Efla þarf innra eftirlit með heilbrigðisþjónustu.
  5. Efla þarf samvinnu og samskipti við sjúklinga og aðstandendur þeirra og koma upp ferli þar sem ábendingar aðstandenda eru teknar til meðferðar án tafar.
  6. Styrkja þarf umbóta- og gæðastarf með markvissum hætti með því að setja fram gæðastefnu og tímasetta aðgerðaráætlun og fylgja henni eftir.

Landlæknisembættið segir, að það sé ljóst að aukin meðvitund og áhersla sé á gæði líknar- og lífslokameðferðar eftir atvik sem urðu á deildinni. Starfsfólk er ánægt með þá fræðslu sem það hefur fengið innan stofnunarinnar um líknar- og lífslokameðferð en brýnt er að efla þá þekkingu og þjálfun enn frekar.

Embætti landlæknis mun fylgja framangreindum ábendingum eftir. HSS mun senda embættinu umbótaáætlun í janúar 2022 og framgangsskýrslu í maí 2022 og í nóvember 2022, segir ennfremur.

mbl.is