Sigurður Bogi Sævarsson
Lóðsbátur kom föstudagsmorgun inn til Vestmannaeyja með stóra kví sem ætluð er fyrir mjaldurssysturnar Litlu-Hvít og Litlu-Grá. Kvíin var sett saman í Þorlákshöfn, en dregin þaðan til hafnar í Eyjum. Aðeins var hægt að sigla austur á bóginn á 2,5 mílna hraða og miðaði ferð því hægt en örugglega, enda var gott í sjó.
Kvínni var komið fyrir til bráðabirgða undir Heimakletti.
Mjaldrarnir tveir, sem komu til Íslands vorið 2019 með flugi frá Japan, eru nú í innanhússkeri á sýningu See life trust í Eyjum. Þær eiga í fyllingu tímans að fara í kvína, sem verður komið fyrir í Klettsvík. Áður hafa systurnar verið um skemmri tíma í umönnunarlaug í víkinni.