Íslensk stjórnvöld hafa hótað því að beita neitunarvaldi í sameiginlegu EES-nefndinni komi til þess að kerfi Evrópusambandsins fyrir viðskipti með heimildir til losunar gróðurhúsalofttegunda verði tekið upp í samninginn um Evrópska efnahagssvæðið (EES), án þess að Íslandi verði veittar undanþágur. Telja íslensk stjórnvöld hættu á að flugsamgöngur til og frá landinu skerðist til muna.

Þetta kemur fram í umfjöllun norska blaðsins Dagsavisen í dag.

Þar segir að íslensk stjórnvöld telji upptöku losunarkvótakerfisins hafa í för með sér aukna álagningu á flugsamgöngur sem kemur Íslandi sérstaklega illa vegna landfræðilegrar legu landsins. Í bréfi íslenskra stjórnvalda til framkvæmdastjórnar Evrópusambandsins segja íslensk stjórnvöld að landið geti verið í hættu um að einangrast þar sem flug er oft eina tæka samgönguleiðin og mikilvæg tenging við umheiminn.

Íslensk stjórnvöld telja losunarkvóta hafa alvarlegar afleiðingar fyrir samg0ngur til og frá landinu. mbl.is/Eggert Jóhannesson

Þá sé í bréfinu bent á að tilskipun Evrópusambandsins mismuni flugi yfir Atlantshaf við millilendingu á Íslandi.

Flugferð sem hefst í Frankfurt og stoppar á Íslandi myndi í kerfi Evrópusambandsins þurfa að greiða fullt losunargjald fyrir legginn Frankfurt-Reykjavík þar sem flugið er innan Evrópska efnahagssvæðisins, en ekki er full gjaldskylda frá Reykjavík til New York. Á móti ef vélin flýgur beint til New York frá Frankfurt fær hún ekki fulla gjaldskyldu.

Þetta telja íslensk stjórnvöld verða til þess að flugfélög velji frekar að sleppa viðkomu á Íslandi.

Koma fólki í lestir

„Þetta bréf snýr eingöngu að flugsamgöngum,“ segir Katrín Jakobsdóttir forsætisráðherra í samtali við Fréttablaðið í dag. „Tilgangur breytinganna er að beina fólki í lestir eða almenningssamgöngur í stað þess að fara í flug. Við Íslendingar erum aftur á móti með þá sérstöðu að við getum ekki nýtt aðra samgöngukosti en flug frá landinu.“

Þá segir hún jafnframt að engar umhverfisvænar lausnir séu í boði hvað flugvélaeldsneyti í lengri flugferðum varðar. „Þessi aðferðafræði bitnar því hlutfallslega verr á okkur en nokkru öðru landi.“

Komi til þess að gripið verði til neitunarvalds verður það í fyrsta sinn í sögu EES sem því er beitt.

Tengdar fréttir

Ísland og ESB

Vilja endurupptöku á viðræðum um aðild að ESB

• Sekta ekki skip sem uppfylla ekki kröfur
• Hitnar í kolum vegna fiskveiði
• ESB gerir athugasemd við fetaost frá MS
• Þekkingarleysi innan ESB-ríkja truflar útflutning

» Fleiri tengdar fréttir

• Blogga um frétt