Sverrir Þór ákærður í Brasilíu
Setja bókamerki
Sverrir Þór Gunnarsson, betur þekktur sem Sveddi Tönn, hefur verið formlega ákærður af ríkissaksóknara í Brasilíu. Sverrir var á miðvikudag ákærður fyrir stórfelld fíkniefnalagabrot á alþjóðavísu, hlutdeild í sambærilegum brotum og skipulagða glæpastarfsemi. Þá er Sverrir sakaður um að vera leiðtogi glæpasamtaka.
Þetta staðfestir heimild mbl.is innan brasilísku alríkislögreglunnar. Þá hafi Sverrir fullan rétt og tækifæri til þess að verjast gegn fyrrnefndum ákærum.
Verði Sverrir sakfelldur fyrir fyrrnefnd brot er það sagt geta haft í för með sér meira en 45 ára fangelsisvist.
Þegar Sverrir var ákærður á miðvikudag voru 84 dagar liðnir frá handtöku þann 12. apríl. Þá hafði lögreglan nýtt 75 daga til þess að rannsaka málið og hina níu til þess að vísa málinu áfram til ríkissaksóknara en níutíu daga ákærufrestur er sagður vanalega algjört hámark í Brasilíu.
Hafi stjórnað samtökunum saman
Þá staðfesti Thiago Giavarotti, yfirlögregluþjónn hjá brasilísku alríkislögreglunni áður, að Sverrir og brasilískur karlmaður hefðu í sameiningu stjórnað glæpasamtökum sem hefðu stundað inn- og útflutning fíkniefna. Þá sagði hann ekki algengt að erlendir aðilar væru hluti af starfsemi sem þessari í Brasilíu.
„Þeir voru í viðskiptum saman. Stundum gat annar keypt fíkniefni af hinum. Þeir áttu líka sameiginlega kúnna þannig að ef annar gat ekki boðið kúnnanum fíkniefni gat hinn gert það. [...] Þeir voru vinir og viðskiptafélagar ekki yfirmaður og starfsmaður,“ sagði Giavarotti á sínum tíma.
Milljarðar í Match point
Eins og fyrr segir var Sverrir handtekinn þann 12. apríl á heimili sínu í Brasilíu en handtaka hans var hluti af umfangsmiklum aðgerðum brasilísku alríkislögreglunnar þar sem um þrjátíu manns voru handteknir. Aðgerðin var kölluð „Operation Match Point“ og tóku meira en tvö hundruð lögregluþjónar þátt, þar á meðal frá Íslandi og Ítalíu.
Í aðgerðunum lagði lögregla hald á 65 kíló af kókaíni, 225 kíló af kannabisefnum og 57 fasteignir auk ökutækja og skipa ásamt því að loka fyrir bankareikninga 43 einstaklinga.
Lögreglan taldi verðmæti eignanna sem lagt var hald á geta numið um 150 milljóna brasilísks ríal eða um 4,2 milljörðum íslenskra króna.
Tóku skýrslu af Sverri vegna mála á Íslandi
Eins og mbl.is hefur áður greint frá fóru fjórir íslenskir lögreglumenn til Rio de Janeiro fyrir aðgerðirnar til þess að yfirheyra Sverri. Voru þeir í Brasilíu í tíu daga áður, á meðan og eftir að aðgerðum lauk, en rannsókn íslensku lögregluþjónanna tengist bæði hundrað milljóna peningaþvættismáli á Íslandi og fíkniefnainnflutningi til Íslands.
Peningaþvættismálið er frá árinu 2019 og snýr að því að fjöldi fólks er grunaður um að hafa umbreytt um átta hundruð til níu hundruð milljónum íslenskra króna í erlenda mynt.
Talið var að peningaþvættið hefði staðið yfir í á þriðja ár áður en embætti héraðssaksóknara réðst í samræmdar aðgerðir ásamt sérsveit ríkislögreglustjóra vegna málsins. Þá staðfesti héraðssaksóknari við mbl.is að nærri fimmtíu manns væru með stöðu sakbornings í málinu.
Hvað varðar fíkniefnamálið herma heimildir mbl.is að um sé að ræða mál sem kallað er stóra kókaínmálið þar sem flytja átti um 100 kíló af kókaíni til landsins í timbursendingu.
Þá er einnig talið að snerting sé við önnur stór fíkniefnamál, en upplýsingar frá frönskum yfirvöldum úr dulkóðaða samskiptaforritinu EncroChat, sem var mikið notað af glæpamönnum víða um heim, varð til þess að menn lögðu saman tvo og tvo við rannsókn nokkurra mála. Það átti meðal annars við um saltdreifaramálið svokallaða líkt og fram hefur komið við meðferð málsins fyrir dómi.
/frimg/1/16/10/1161072.jpg)
Ók á ofsahraða á móti umferð og uppi á stétt
Ólíkt ákall fólks á landsbyggðinni
Fjallabak, Sprengisandur og niður í Eyjafjörð
Breytingar á skipulagi fréttadeildar RÚV
Bregðast við vopnahléstillögu á morgun
Fjöldi brota ríflega sexfaldaðist
Rothissa á vinnubrögðum forystu BÍ
Sennilega gróðureldur, ekki ný sprunga